Pyaar – Ek Ehsaas
Pyaar kya hai? Ek ehsaas.
Pyaar woh ehsaas hai jo seedha dil ko chhoo jaata hai,
Jo mehenga gift nahi, balki chhoti-chhoti baaton mein dikhta hai –
Jaise kisi ka muskurakar haal puchhna,
Bina kahe tumhari pasand ka khayal rakhna,
Ya sirf tumhare thakne par chupchaap paas baith jaana.
Pyaar us andaaz mein chhupa hota hai,
Jisme koi tumse baat karta hai –
Uski baat ki mithaas, uski aankhon ki chamak,
Aur uski chhoti-chhoti harqatein keh jaati hain:
"Main tumhara hoon."
Jab koi tumhare har ache-bure waqt mein saath hota hai,
Toh dheere-dheere tum uske liye deewane ho jaate ho.
Woh sirf ek insaan nahi rehta,
Woh tumhara sukoon ban jaata hai.
Pyaar koi badi kahani nahi hoti,
Woh ek chhoti si duniya hoti hai –
Jahan sirf do dil ek dusre ki dhadkan ko mehsoos karte hain.
Kabhi pata hi nahi chalta ki hum kab
"pyaar" mein pad gaye...
Pyaar ko samajhna aasan nahi hota.
Pehli baar jab hum kisi se pyaar karte hain,
Toh humein bhi pata nahi chalta ki yeh pyaar hai.
Woh ehsaas dheere-dheere dil mein bas jaata hai –
Bina shor ke, bina dastak diye.
Pyaar woh ehsaas hai jo bina kahe bhi sab kuch keh jaata hai.
Jab kisi ke liye aapka fikar badhne lage,
Jab uska ek chhota sa muskurana aapka din bana de,
Jab uska chup rehna aapko bechain kar de...
Toh samajh lijiye, dil kahin jud chuka hai.
Aur sabse khaas baat yeh hoti hai ki yeh sab bahut hi khamoshi se hota hai.
Kabhi-kabhi toh humein tabhi samajh aata hai,
Jab woh insaan ek din ke liye bhi busy ya door ho jaata hai.
Uski kami mehsoos hoti hai,
Uski awaaz ki aadat lag jaati hai,
Aur us waqt dil kehta hai – "Shaayad yeh hi pyaar hai."
Pyaar sirf paas hone se nahi hota,
Pyaar us connection mein hota hai jo dil se dil banta hai – bina kisi shart ke.
Rishte – Jahan Baat Mein Bastaa Hai Apnapan
Kabhi-kabhi rishte kisi naam ke mohtaj nahi hote.
Woh roz ki chhoti-chhoti baaton mein palte hain –
Jab aap roz kisi se baat karte ho,
Apne din ki har chhoti baat share karte ho,
Kabhi hansna, kabhi thakna, kabhi uljhan... sab kuch.
Toh mehsoos hota hai, "Yeh insaan apna hai."
Dheere-dheere aap apna past, present, aur future tak ke sapne us insaan se baatne lagte ho –
Bina dare, bina soche, sirf dil se.
Aur haan, yeh zaroori nahi ki yeh sab sirf kisi ladka-ladki ke beech ho,
Sache rishte toh dosti mein bhi hote hain.
Woh dost jise aap bina kisi dar ke sab kuch keh sakte ho,
Jise dekhkar sukoon milta hai.
Rishte koi "title" nahi, ek ehsaas hote hain –
Jo har din ki baat mein, har pal ki muskaan mein,
Aur har chhoti si care mein chhupa hota hai.
Dosti Aur Pyaar Mein Bas Thoda Sa Farq Hota Hai...
Kabhi-kabhi hum kisi ke bahut kareeb hote hain,
Har baat share karte hain, har pal saath hote hain –
Lekin phir bhi ek halka sa farq reh jaata hai.
Dost hamesha available hote hain.
Woh jaante hain ki tum kaun ho,
Aur bina kisi umeed ke, bina kisi shak ke, hamesha saath khade rehte hain.
Lekin jab woh rishta opposite gender ka hota hai,
Toh thodi si jhijhak, thoda sa dar,
Aur kai ankahe jazbaat bhi saath hote hain.
Shayad isliye,
Dosti mein apnapan hota hai,
Aur us rishton mein... dil ki dhadkan chhupi hoti hai.
Pyaar – Ek Aisa Ehsaas
Jahan ek-dusre ke saamne jhukna haar nahi lagta,
Balki rishton ki sabse badi taqat hoti hai.
Jab koi aapka sab kuch ban jaata hai,
Hum apni zindagi ki har chhoti-badi baat usse share karte hain,
Aur hairani ki baat yeh hoti hai ki waqt ka pata bhi nahi chalta.
Na din ka hosh rehta hai, na raat ki thakaan.
Dheere-dheere woh insaan hamari aadat ban jaata hai...
Aur phir sabse zaroori hissa bhi।
Kab woh hamari zindagi mein itna khaas ban gaya —
Yeh samajhne mein waqt guzar jaata hai।
Yeh hi to hai asli pyaar ki khoobsurti —
Bina plan kiye, bas dil se jud jaana।
"Isliye maine kaha tha, pyaar lafzon se nahi, ehsaas se hota hai।"
Kya tum bhi khud ko meri baat se jodh pa rahe ho?
Kya tumhare saath bhi kabhi aisa kuch hua hai?
Kya tum bhi un beete lamhon ko yaad kar pa rahe ho?
Pyaar – Ek Khamoshi Jo Sab Keh Jaati Hai
Pyaar ek aisi khamoshi hai,
Jab kehne ko kuch nahi hota,
Phir bhi dil karta hai ki bas usse baat hoti rahe।
Na koi khaas baat hoti hai,
Na koi naya kissa,
Phir bhi uske paas hone ka ehsaas hi
Sabse sukoon dene wali baat ban jaata hai।
Kabhi-kabhi hum sirf uski awaaz sunna chahte hain,
Uski saans ki khamoshi mein khud ko mehsoos karna chahte hain...
Sacha pyaar khud rasta dhoondh leta hai।
Kabhi mann nahi lagta,
Kabhi bechaini gher leti hai,
Chhoti-chhoti nok-jhok bhi hoti hai,
Kabhi-kabhi ladai bhi।
Lekin agar pyaar sacha ho,
Toh baat khud-ba-khud ho jaati hai —
Kyuki sacha rishta to kabhi tootta nahi,
Bas thodi der ke liye chup ho jaata hai।
Kabhi-kabhi woh khamoshi bhi bahut sataati hai,
Jab woh insaan paas nahi hota...
Jiski maujoodgi mein har lamha zinda lagta tha।
Uske bina sab kuch ajnabi sa lagne lagta hai —
Jaise waqt bhi ruk gaya ho,
Jaise har cheez adhoori ho gayi ho।
Aur is akelapan ka ehsaas,
Tabhi gehraai se samajh aata hai
Jab aap sach mein... akele hote ho।
Kyuki kuch log sirf saath nahi hote —
Woh hamari zindagi ka hissa ban jaate hain।
Jab Khamoshi Bhi Pukarne Lage...
Woh khamoshi itni gehri ho jaati hai,
Ki dil apne aap usse baat karne ko taras uthta hai।
Aur phir...
Tum khud hi message ya call kar dete ho।
Kyuki kuch rishte khamosh nahi reh sakte।
Jahan pyaar sacha hota hai...
Wahan tumhare beech mein kabhi "ego" jaisi koi cheez nahi hoti।
Kyuki jahan dil judte hain,
Wahan ahankaar nahi — sirf apnapan hota hai।
Agar main apni baat karoon toh —
Hum pyaar bhi karte hain,
Jhagda bhi karte hain,
Kabhi-kabhi ek-dusre ko sunaate bhi hain...
Lekin yeh sab isliye nahi ki door jaana chahte hain,
Balki isliye kyuki hum ek-dusre ke bina reh nahi sakte।
Hum ek-dusre ki parwah karte hain।
Hamare har jhagde ke baad,
Hum aur kareeb aa jaate hain।
Kyuki sache rishte mein naraazgi hoti hai,
Magar doori kabhi nahi hoti।
Pyaar Waqt Ke Saath Badalta Nahi – Gehraa Hota Jaata Hai
Woh pyaar nahi jo waqt ke saath badal jaaye,
Balki pyaar to woh hota hai jo
Har lamhe ke saath aur bhi gehra hota jaaye।
Jahan rishte waqt ki raftaar se nahi thakte,
Balki aur majboot ho jaate hain।
Agar aapki zindagi mein bhi koi aisa insaan hai,
Jo is busy duniya mein bhi
Aapka haath thaame hue hai,
Toh yakeen maaniye —
Aap bahut hi khushnaseeb hain।
Kyuki is waqt mein jab har koi waqt ke saath badal jaata hai,
Agar koi aaj bhi aapka saath nibha raha hai,
Aapki khamoshi ko samajh raha hai,
Aur har mushkil ghadi mein aapke saath khada hai —
Toh woh sirf ek insaan nahi...
Woh aapki zindagi ki sabse khoobsurat daulat hai।
"Jab pyaar asal hota hai,
Toh waqt use kamzor nahi karta,
Balki aur majboot bana deta hai।"
Kya aapne kabhi yeh sab mehsoos kiya hai?